Разочарувања и изненадувања, подеми и падови, Секоја од 24-те земји-учеснички на свој начин го одигра ова 16-то Европско првенство, а по крајот наше е да го оцениме настапот на сите.
Турција - 4: Веројатно најголемото разочарување на ова Европско првенство е репрезентацијата на Турција. Гледајќи го составот, нема кој не ги виде како ја минуваат групата. Наместо тоа, загубија трипати, а едвај постигнаа еден единствен гол.
Велс - 5,5: Не го повторија чудото од претходниот континентален собир кога стигнаа до полуфиналето. Кога Бејл не е во форма, доаѓаат проблемите. Ја минаа групата, но веднаш потоа беа испратени дома од Данска.
Швајцарија - 7,5: Килаво ја минаа групата, но потоа направија големо изненадување исфрлајќи го светскиот шампион Франција и тоа со пресврт. На Џердан Шаќири и дружината не им појде од рака истото против Шпанија, но излегоа со кренати глави.
Русија - 4: Оставија впечаток на многу нежен тим. Една победа против дебитантот Финска е никаков успех.
Финска - 5,5: На својот дебитантски настап успеаја да победат против Данска во оној драматичен натпревар со Кристијан Ериксен. Потоа издишаа, но од дебитантите никој и не бараше повеќе.
Македонија - 5,5: За нив да се биде на ЕУРО веќе беше голема победа. Се вратија дома без бодови, но Горан Пандев уште еднаш покажа дека е голем лидер.
Украина - 6: Ја минаа групата со само 3 бода, а потоа во една волшебна ноќ ја минаа Шведска за потоа четвртфиналето со Англија да се покаже како преголем залак.
Шкотска 5,5: Конечно се вратија на едно големо натпреварување. Освоија само еден бол, но не било каков туку на „Вембли“ против лутиот ривал Англија, натпревар кој и заслужија да го добијат. За шкотските навивачи ова реми беше како победа, а мора да се признае и дека имаа тешка група.
Чешка - 6,5: Ја минаа групата, ја пратија дома Холандија и на крајот беа елиминирани во еден одличен натпревар со Данска. Патрик Шик со 5 гола беше рамо до рамо со најдобриот стрелец на турнирот, а неговиот гол од пола терен против Шкотска на крајот ја доби наградата за најдобар гол.
Полска - 4: Левандовски сам не може да прави чуда. Полска не е тим за последно место во групата. Разочарувањето е уште поголемо кога ќе се види дека со Шпанија ги поделија бодивите, а загубија од другите.
Хрватска - 6: Се предадоа само против Англија и Шпанија. Модриќ покажа дека сѐ уште е на врвот, а нивниот дуел против „Црвената фурија“ останува како веројатно највозбудливиот на првенството.
Шведска - 5,5: Го освоија првото место во групата на сметка на Шпанија, но потоа успеаја да испадна од Украина од готово правејќи вересија.
Унгарија 6: Во групата на смртта испаднаа како последни, но излегоа со главите кренати највисоко што може. Водеа и против Франција и против Германија со кои на крајот освоија по бод, а единствено загубија од Португалија со голови во последните десетина минути.
Словачка 5,5: Топло-ладно. Загубија машки од Шведска, ја победија Полска, доживеаја дебакл од Шпанија.
Австрија 7: Прв пат во својата историја победија натпревар на ЕУРО и воедно ја минаа групата, а потоа ја натераа Италија да игра продолженија рушејќи ѝ ја серијата без примен гол.
Португалија - 6: Нормално, неговото височество Кристијано Роналдо продолжи со головите и стана најдобар стрелец. Бранителот на тронот заглави против моќната Белгија и се врати дома уште во осминафиналето.
Белгија - 4,5: Од Белгијците многу се очекуваше на ова ЕУРО, можеби конечно едно финале. Лукаку си ја заврши работата, но изостана онаа препознатлива убава игра која ја негуваше селекторот Мартинес.
Холандија - 4: Веднаш после елиминацијата селекторот Франк де Бур си поднесе оставка. Тоа доволно кажува каков настап имаше „Оранје“.
Германија - 4: Имаа таква среќа освен да играат во групата на смртта туку и веднаш потоа да налетаат на Англија. Прикажаа една „дупната“ одбрана, нетипично за „ди Маншафт“.
Данска - 8: Стравот за живот на Кристијан Ериксен се претвори во мотив за Данците кои откако се освестија почнаа да играат турбо и дојдоа до полуфиналето каде заминаа во продолженија и испаднаа поради подарен пенал. Не го повторија летото од 1992, но постигнаа сличен успех.
Франција - 3: Избраниците на Дешан почнаа силно со победата над Германија, но потоа полека им гаснеа моторите. Нерешено со Унгарија, нерешено со Португалија и нерешено со Швајцарија (со прокоцкано водство од 3:1) која ги исфрли на пенали. Мбапе разочара, како и светскиот шампион.
Шпанија - 7,5: И покрај сите проблеми и купот нови момци, Шпанија за многумина го играше најубавиот фудбал. Луис Енрике повторно покажа дека е добар стратег, ги собра аплаузите излегувајќи на пенали од Италија во полуфиналето.
Англија - 8: Гледајќи низ очите на англиските навивачи, разочарувањето е огромно, гледајќи од страна имаа многу лесен пат до финалето. Останува фактот дека беа убедени во пехарот, а загубија на пенали на својот „Вембли“. Имаат тим кој ветува светла иднина.
Италија - 10: Највисоката можна оцекна за „Аѕурите“ бидејќи тоа и го заслужија. Најголеми пофалби за Роберто Манчини кој го препороди тимот кој не успеа да се квалификуна на Мундијалот во 2018. Италијанците играат налик на тики-таката на шампионската генерација на Шпанија и ги освоија симпатиите на многумина.