Група од 77 пратеници на Европскиот парламент испрати писмо до лидерите на европските институции во кое предупредуваат дека распоредувањето на руски војници во Белорусија претставува закана за цела Европа.
„Би сакале да ја изразиме нашата длабока загриженост дека неодамнешното распоредување на руски трупи во Белорусија претставува закана за Украина, Полска, Литванија, Латвија и цела Европа“ се вели во писмото до претседателот на Европскиот совет Шарл Мишел, претседателката на Комисијата Урсула фон дер Лајен и претседателката на Европскиот парламент Роберта Мецоли.
Пратениците истакнуваат дека континуираното присуство на руските воени сили на барање на нелегитимниот режим на Александар Лукашенко треба да се смета за окупација на Белорусија.
Руските маневри во Белорусија се поопасни од оние на украинската граница
Во писмото, исто така, се наведува дека „секоја дипломатска одлука за одвраќање на можна руска агресија врз Украина мора да предвиди независна и демократска иднина за Белорусија, а не на нејзина штета“.
Литванскиот европратеник Петрас Аустревичиус вели дека „руските маневри внатре во Белорусија се поопасни од оние на границата со Украина“.
Во писмото се вели дека најновите воени вежби на руската и белоруската армија може да доведат до трајно распоредување на руските сили, вклучително и конвенционално и нуклеарно оружје, во Белорусија.
