Полиците со книги претставуваат парче мебел на кое при уредувањето на домот не му се придава посебно внимание, а често се поставуваат каде што ќе остане место, колку да го пополнат просторот.
Фенг шуи учењето најмногу внимание посветува на ориентацијата во просторот и неговото планско уредување за да се обезбеди напредок, па со ваквото однесување кон полиците со книги, според ова верување, го блокирате просперитетот во домот.
Бидејќи книгите се ризница со знаење, тогаш веројатно ви е јасно дека имаат посебно значење во оваа филозофија.
Фенг шуи препорачува полиците за книги, кои се заслужни за пренос на знаење и кои се производ на човековата креативност и имагинација, да се постават во осветлена просторија за креативната енергија да може без пречки да се развива и расте.
Некои од најпознатите фенг шуи теории користат кардинални правци за создавање на 8 одредени делови од собата. За секој правец се вели дека има единствени квалитети на позитивна или негативна енергија.
Според ова верување, западот е страна, односно правец на креативноста, па поставувањето полици со книги на западната страна од собата го покренува движењето на креативната енергија.
Енергијата на среќата, односно радоста, се подигнува кога книгите се наоѓаат во средишниот дел од просторијата. Како што влезот во домот претставува проток на позитивна енергија и поттикнува креативно размислување, не е лоша идеја својата полица со книги да ја поставите близу влезот.
Според фенг шуи верувањето, негативната енергија кога го блокира протокот на позитивна енергија предизвикува неред. Ова не се однесува само на неред во просторијата, туки и на неред на самата полица за книги.
Поради тоа неопходно е од полиците со книги редовно да се брише прашината, додека старите и оштетени книги да се отстрануваат. Задржувањето на овие книги, според фенг шуи, прави негативната енергија да се задржи во домот.