Светската куќа на фудбалот денеска го претстави официјалното лого за Мундијалот 2026 и предизвика лавина незадоволство ширум интернетот поради логото кое личи како воопшто труд да не е вложено во неговата изработка.
Светското првенство во 2026 година за прв пат ќе се одржи во три земји и тоа Канада, САД и Мексико, а воедно наместо 32 ќе учествуваат 48 репрезентации. На три години до светскиот собир ФИФА го претстави логото на првенството на настан во Лос Анџелес на кој присуствуваа претставници на трите земји-домаќини, фудбалски легенди и специјални гости, меѓу кои и Роналдо кој со Бразил освои две мундијалски титули (1994 и 2002).
„Ова е моментот кога трите земји и целиот континент можат колективно да кажат: 'Ние сме обединети и заедно сакаме да му посакаме добредојде на целиот свет и да го направиме најголемото, најдоброто и најинклузивното можно Светско првенство досега'. Турнирот ќе им овозможи на сите три земји домаќини самостојно да напишат своја страница во историјата на Мундијалите, а ова уникатно брендирање е првиот чекор кон 2026 година“, изјави претседателот на ФИФА, Џани Инфантино.
Навивачите се крајно разочарани од дизајнот и многумина не штедат зборови за да ја критикуваат ФИФА. Двете бројки 2 и 6 една над друга, а над нив пехарот. Поедноставно веројатно и не можело.
„Изгледа како нешто направено во Paint за две минути“, „Сигурно многу време потрошиле на ова“, „Ова е најлошото лого што сум го видел“, „Сигурно им требало години за ова да го смислат“, „Најлошо во во историја! Нула креативност“, „Хахаха, добра шега. Ајде сега објавете го вистинското“, се дел од лавината коментари.
За разлика од мундијалските вљубеници, ФИФА логото го опишува на следниов начин:
„За прв пат во историјата слика од вистинскиот пехар и годината на одржувањето на турнирот се претставени, со што се создава иновативен дизајнерски јазик кој го закотвува амблемот на ФИФА Светското првенство за 2026 и понатаму. Сликата на пехарот и годината му дозволуваат на секој домаќин да рефлектира уникатност кога ќе изработува идентитетска бренд структура за годините што доаѓаат“.
