Дисциплинската комисија на ФИФА го суспендираше поранешниот претседател на Кралската шпанска фудбалска федерација (РФЕФ), Луис Рубиалес, од сите должности на 3 години. За време на суспензијата, тој не смее да врши никаква функција во национални или меѓународни фудбалски тела.
Причина за суспензијата е сексистичкиот скандал на финалето на Мундијалот за жени. Да потсетиме, сето тоа се случи за време на доделувањето на златните медали на Шпанките, кога Рубиалес ја бакна фудбалерката Џенифер Ермосо.
Ермосо, инаку фудбалска легенда, подоцна за време на пренос во живо на Instagram изјави дека не ѝ се допаднал потегот на Рубиалес.
Но, претседателот не застана тука. За време на прославата во соблекувалната ја прегрна Ермосо и ѝ рече: „Јас и ти ќе се венчаме на Ибица“.
Ермосо поднесе официјална жалба до обвинителството против Рубиалес, кој потоа под голем притисок од јавноста поднесе оставка од сите негови функции.
Во Мадрид е во тек посебно судење. Рубиалес ги отфрли наводите за сексуална злоупотреба и принуда што ги покрена Ермосо против него. Обвинителот побара од судијата да му забрани на Рубиалес да ѝ се доближува на фудбалерката поблиску од 500 метри, што беше прифатено.
Рубиалес четири години беше потпретседател на УЕФА под водство на Александер Чеферин, а беше сменет на 10 септември годинава токму поради овој скандал. РФЕФ ја водеше од мај 2018.
46-годишникот од Лас Палмас е поранешен дефанзивец чија кариера најмногу беше во Сегунда Дивисион играјќи за Гуадикс, Мајорка Бе, Љеида, Херес, Леванте и Аликанте. Со Леванте заигра и во Ла Лига. Во 2009 година потпиша за шкотскиот премиерлигаш Хамилтон, но по само 3 натпревари одлучи на 32-годишна возраст да се пензионира.