Цените на гасот сега се пониски во ЕУ отколку пред руската инвазија на Украина, изјави претседателката на Европската комисија Урсула фон дер Лајен.
„Мораме да продолжиме да го зголемуваме притисокот врз Русија и, се разбира, ќе продолжиме со нашата непоколеблива поддршка за Украина“, додаде таа на прес-конференција.
На почетокот на шестмесечното претседавање на Шведска со Европската Унија, Фон дер Лајен рече дека Русија го намалила снабдувањето со гас од ЕУ за 80 отсто во осум месеци од почетокот на конфликтот во Украина, но дека ЕУ го компензирала тоа со диверзифицирање.
„Без сомнение, пред војната бевме премногу зависни од руските фосилни горива. И Русија ја искористи оваа зависност и почна да води енергетска војна.
Русија се обиде да нè уценува, но не успеа благодарение на нашето единство. Напорната работа се исплатеше. Цените на гасот сега се пониски отколку пред руската инвазија“, рече таа на заедничката прес-конференција со шведскиот премиер Улф Кристерсон во Кируна, Шведска.
