Познатиот уругвајски фудбалер Диего Форлан треба да заигра тенис на ИТФ турнир во јуни.
Јужноамериканските медиуми јавуваат дека Диего, кој од детството има страст кон тенисот, е пријавен за турнирот во Лима.
Турнирот е закажан за средината на јуни и ќе трае од 15 до 22, а ќе се игра во Мирафлорес, Лима, на земја.
MT1000 е еден од 30-те турнири од ваков вид на ИТФ турнејата во светот, а Форлан ќе биде само еден од оние што ќе учествуваат на 17-тото издание на турнирот наменет за играчи од 30 до 85 години.
Форлан на ИТФ рангирањето е на 916. место во сингл, додека во двојки е на 560. место. Диего спортската кариера ја направи во фудбалот, но од 8 до 16 години беше член и на тенискиот клуб Караско во Монтевидео.
Љубовта кон тенисот никогаш не ја заборави, а го играше рекреативно и во текот на фудбалската кариера, па зборуваше за играњето против Руд ван Нистерлој во Манчестер Јунајтед.
„Ван Нистелрој ме предизвика да играме бидејќи имал играно малку тенис, но не знаеше дека јас не сум почетник. Атмосферата беше таква што менаџерот и директорите дојдоа да гледаат. Сер Алекс рече дека знаел дека сум играл порано и ставил пари на мене. Јас го добив мечот, а Алекс ги освои парите“, изјави Форлан, кој беше англиски шампион со Јунајтед во раните 2000-ти.
Во текот на својата кариера, сега 44-годишниот играч играше за Индепендиенте, Манчестер Јунајтед, Виљареал, Атлетико, Интер, Интернасионал, Серезо Осака, Пењарол, Мумбај Сити и Китчи.
Неговиот придонес за репрезентацијата на Светското првенство во Јужна Африка најдобро се памети кога Уругвај стигна до полуфиналето, а Форлан беше најдобар играч на Мундијалот. Во 2011 со Уругвај ја освои Копа Америка среде Аргентина. Одигра 112 натпревара за „Селесте“ на кои постигна 36 голови