Очигледно не е само Кристијано Роналдо неуморен фудбалски работник, бидејќи слични зборови доаѓаат од Островот и тоа за Мохамед Салах.
На 9 натпревари во Премиер лигата има постигнато 10 голови и 5 асистенции. Во Лигата на шампионите на 3 натпревари даде 5 гола. Мохамед Салах моментално е фудбалерот во најдобра форма. И тоа очигледно не е воопшто случајно.
Во интервју за Goal резервниот голаман на Ливерпул открива како целиот тим е импресиониран од Египќанецот, кој не случајно игра во животна форма.
„Тој е вистински работник. Никогаш не зема слободен ден. Секогаш тренира или прави вежби за опоравување, дури и неколку часа по натпреварите тој прави нешто за да ги опорави мускулите и да биде подготвен за наредниот натпревар“, открива Адриан.
„Неверојатно е како тренира. Тоа што моментално е во одлична форма нема врска со среќа. Да бидеш еден од најдобрите играчи на светот и да покажуваш исто ниво на секој натпревар, давање голови, додавања, темпо, дриблинзи, тој е неверојатен“, додава во еден здив.
Адриан Сан Мигел дел Кастиљо од август 2019 година му е соиграч на Салах, но како замена за единицата Алисон. Андалузиецот тогаш дојде од редовите на Вест Хем, а потекнува од академијата на Бетис од неговиот роден град Севиља.
„И го заслужува ова. Навистина сме среќни за него, но воедно потребен му е и тимот да биде зад него и тој е свесен за тоа. Тој е еден од најскромните личности во соблекувалната, а работи крајно напорно. На сите им е многу пријатно да имаат некој како Мо, кој се наоѓа во одличен моментум. Но, ние сме 25 играчи. Ние сме тим и секој мора секојдневно да го поттикнува другиот“.
Ни Роналдо, ни Меси, за Адриан најдобар фудбалер на светот е Мохамед Салах.
„Мо, за мене, е дефинитивно најдобриот на светот“.