Ако полицијата во американската држава Џорџија го фотографира Доналд Трамп оваа недела во врска со неговото обвинение за обид за манипулација со резултатите од изборите во 2020 година, таа фотографија, без преседан за американски претседател, веднаш ќе влезе во историјата.
77-годишниот републиканец има рок до петок доброволно да се предаде на судството во Џорџија, кое покрена обвинение против него, врз основа на законот за учество во криминална организација.
Доналд Трамп, кој веќе е обвинет во три различни случаи, во последните месеци се појави пред судот во Њујорк, Мајами и Вашингтон.
Иако досега успешно го избегнуваше вообичаениот процес на апсење кој вклучува земање отпечатоци и снимање две фотографии - анфас и профил – Џорџија не простува така лесно.
„Без оглед на вашиот статус, ние сме подготвени да ве фотографираме“, им рече на новинарите на почетокот на август Патрик Лабат, шерифот на округот Фултон задолжен за случајот.
Ваквиот диптих, „mugshot“ на англиски, има тенденција да ги прогонува познатите личности.
Така, Доналд Трамп би можел да им се придружи на Ал Капоне, О.Џ. Симпсон, Џејн Фонда и Хју Грант.
Без разлика дали се фотографира насмеан, со неговите совршени заби или претпочита да се одлучи за посериозно однесување кое го прави кога сака да се прикаже себеси како силен лидер, фотографијата од апсењето на Трамп сигурно ќе биде историска, доколку се случи.
Како и онаа на О.Џ. Симпсон, фотограафијата ќе биде на насловните страници на весниците. А речиси сигурно е дека, како и фотографијата на Џејн Фонда, ќе биде испечатена на маички. А можеби и на неговата веб-страница.
