Клубот на македонската фудбалска легенда размислува да направи промена на тренерското столче, а на повидок е Џенаро Гатузо да седне на истото.
Работата на Давиде Балардини во Џеноа од ден на ден станува сѐ понеизвесна откако клубот доби ново сопствеништво. Calciomercato оди и дотаму што објави дека неделниот натпревар со Сасуоло ќе му биде последен на клупата на „Грифоните“.
Компанијата 777 Partners од Мајами купи 99,9% од акциите во клубот, но го остави довчерашниот сопственик Енрико Прециози да биде претседател на клубот. Сепак, новите газди сакаат најстариот италијански клуб да го кренат на повисоко ниво од она на кое е моментално, односно грчевитата борба за опстанок.
За таа цел прво нешто кое сакаат да го направат е да постават нов тренер, а изборот паднал на Џенаро Гатузо. Клубот веќе остварил контакт со Гатузо, кој според италијанските медиуми на прв поглед не бил расположен за преземање на Џеноа. Но, преговорите продолжуваат.
Доколку Гатузо седне на клупата на клубот од Џенова, ќе му биде тренер и на Горан Пандев, кој веќе седма сезона ги брани боите на клубот, наводно негова последна во кариерата.
Гатузо е слободен агент откако по завршувањето на минатата сезона ја напушти клупата на Наполи. Се имаше договорено да ја преземе Фиорентина од 1 јули, но уште во средината на јуни ја раскина соработката во управата.