Основачот на Микрософт на TechCrunch конференцијата изјави дека криптовалутите се измама за будали.
„Тие трендови на дигитален имот сто проценти се темелат на теорија на поголеми будали“, изјави Гејтс, пренесе CNN Business.
Гејтс се осврна на теоријата според која понекогаш може да се заработи со купување на преценет имот ако тој имот подоцна може да се продаде по уште повисока цена.
Еден будала во тој случај може да купи прескап имот, надевајќи се дека може да го продаде на уште поголема будала од себе и така да заработи. Тоа може да функционира се додека има доволно будали спремни да платат повеќе. Но, кога веќе никој нема да сака да купува, се прекинува низата и следи значаен пад на цената, објасни Гејтс.
Тој вели дека не тргува со криптовалути, наместо тоа преферира старомодни вложувања.
„Навикнат сум да вложувам во имот, како фарма која има производство или компании кои нудат вистински производи“, вели Гејтс.
Неговата изјава доаѓа во момент кога биткоинот и другите криптовалути се во слободен пад. Во ноември, 2021 биткоинот достигна врв од 69.000 долари. Оттогаш изгуби две третини од вредноста и денес е 20.000 долари.
Гејтс и претходно беше скептичен кон криптовалутите.
