Откако синоќа компанијата сопственик нa локалот на ул. „Македонија“ почна самостојно да ја отстранува нелегалната доградба, денеска градоначалникот на Општина Центар порача дека дивоградби во оваа општина нема да се толерираат.
„Започнуваме со засилени инспекциски контроли за нелегални доградби и поставена урбана опрема и тераси на рестораните, кафе баровите, кафеаните и останатите локали“, најави градоначалникот Горан Герасимовски.
„Ќе се врши увид во документацијата што ја поседуваат сопствениците и инвеститорите на објектите и ќе се санкционираат сите кои не поседуваат одобрение за поставување урбана опрема и нелегалните доградби“.
„Повторно упатувам апел до сите засегнати, да ја поседуваат целосната документација и да ја имаат подмирено комуналната такса. Во спротивно, ќе бидат изречени казни, а онаму каде што има потреба, општината ќе ги отстрани нелегалните доградби, со што трошокот за отстранување ќе падне на товар на сопствениците на објектите“, заврши тој.