Сојузниот канцелар на Германија, Олаф Шолц, најави дека земјата на одреден период ќе го прекине пуштањето во употреба на гасоводот Северен поток 2 поради неодамнешните активности на Русија во источна Украина.
Според германските медиуми, Шолц денеска изјавил дека поради руското признавање на Доњецк и Луганск, одлуката за сертификација на руско-германскиот гасовод ќе биде ставена во мирување.
„Како одговор на руските активности во Украина, федералната влада го затвора проектот за гасоводот Северен поток 2. Без таа потврда, Северен поток 2 не може да започне со работа“, објаснуваат германските медиуми.
Според Frankfurter Allgemeine Zeitung , Шолц денеска побарал од Министерството за економија да го повлече постоечкиот извештај за анализа на безбедноста на снабдувањето, кој е клучен документ во сертификацијата „Северен поток 2“.
„Можеби звучи технички, но тоа е неопходен административен чекор без кој гасоводот не може да се сертифицира. Без сертификација, Северен поток 2 не може да биде пуштен во употреба“, рече Шолц.
Според Министерството за економија, надлежните од овој сектор во наредниот период ќе направат нова проценка за безбедноста на снабдувањето, имајќи ги предвид сите факти и настани во последните неколку дена.
„Во оваа фаза сега е важно, покрај првите санкции, да се спречи понатамошна ескалација, а со тоа и нова катастрофа. Сите наши дипломатски напори се насочени кон таа цел“, објасни Шолц.
Проектот „Северен поток 2“ од самиот почеток не наиде на одобрување кај западните сојузници, кои на него гледаа проект со кој Русија сака да го прошири своето економско и политичко влијание во Европа.
Во последните неколку месеци, откако конфликтот во источна Украина повторно ескалираше, многу западни претставници истакнаа дека блокадата на проектот Северен поток 2 мора да биде дел од санкциите што Западот би можел да ги искористи против Русија.
Иако новата германска влада беше претпазлива за суспендирање на проектот, неодамнешните руски активности и признавањето на Доњецк и Луганск како независни територии ја принудија германската федерална влада да го забрза процесот на санкции, кој ќе го вклучи и контроверзниот проект Северен поток 2.
