Сензационалниот гол од огромна далечина на Чехот против Шкотска уште на почетокот од првенството ја доби наградата за најдобар гол на 16-тото Европско првенство.
Откако извиси во изборот за најдобар стрелец иако имаше исто голови, 5, колку и Кристијано Роналдо, а потоа не го ставија ниту во најдобрите единаесетмина, Патрик Шик сепак од ЕУРО 2020 заминува со награда.
Откако стручното жири на УЕФА издвои 10 голови и ги стави на јавно гласање, за 24 часа пристигнаа околу 800 илјади гласови од кои најголемиот дел заминаат кај Чехот.
Голот на Шик падна на 14 јуни во 1. коло од групата Д на натпреварот помеѓу неговата Чешка и кодомаќинот Шкотска кој се одигра на „Хампден Парк“ во Глазгов.
Во 52. минута Шкотите ја загубија топката во чешката половина, Чесите веднаш поитаа во контра додавајќи до истурениот Шик кој од пола терен примети дека голманот Дејвид Маршал е излезен и го матираше со силен и прецизен удар.
Во конкуренција за најдобар гол беа и головите на Пол Погба (Франција - Швајцарија 3:3), Лука Модриќ (Хрватска - Шкотска 3:1), Лоренцо Инсиње (Белгија - Италија 1:2), Кевин Де Брујне (Данска - Белгија 1:2), Кристијано Роналдо (Унгарија - Португалија 0:3), Алваро Мората (Италија - Шпанија 1:1), Микел Дамсгард (Англија - Данска 2:1), Андриј Јармоленко (Холандија - Украина 3:2) и Федерико Кјеза (Италија - Шпанија).
Стручното жири на УЕФА кое ги бираше головите е истото кое ги одбра и најдобрите 11, односно Патрик Бонер, Естебан Камбиасо, Фабио Капело, Космин Контра, Корин Диакр, Жан-Франсоа Домерк, Душан Фитцел, Штефен Фројнд, Франс Хук, Аитор Каранка, Роби Кин, Хинес Мелендес, Дејвид Мојс, Мика Паателаинен, Петер Рудбек и Вили Рутенштајнер.