Откако Град Скопје почна иницијатива за ослободување на дрвјата заробени со бетон, граѓани чии апели за дрвјата во нивните маала не беа слушнати, сами почнаа да ги ослободуваат.
Неколку ослободени дрвја во градскиот парк и на фреквентните булевари и толку, запре ослободувањето на заробеното зеленило.
Во скопската населба Пролет, во самиот центар на градот, жителите ослободувањето го земаа во свои раце. Откако чекањето Град Скопје да ги ослободи дрвјата веќе дошло до година дена, решиле да пробаат тоа да го направат сами. Ги ослободиле оние дрвја кои биле заробени со бекатонски плочи, а за другите потребна е механизација па тие и натаму се оставени на милост на Град Скопје и нивното ветување од пред повеќе од една година.
Во меѓувреме, во иницијативата се вклучи и Види Вака од каде заедно со професори од Шумарскиот факултет изработија интерактивна мапа на која со фотографии се означуваат заробените дрвја низ градовите ширум Македонија. Еколошки совесните граѓани можат да испраќаат фотографии од заробени дрвја со наведување на точна локација на и-меил contact@vidivaka.mk по што тие ќе бидат додадени во мапата.
Летото е период кога на дрвјата најмногу им е потребна вода, која тогаш и онака ја има слабо, а со заробеноста и онаа малку што ја има скоро и да не доаѓа до нив. Друг проблем е што дрвјата растат и во широчина, не само во висина, а од бетонот буквално се гушат при растењето и потоа доаѓа до исушување.