Грција денеска ги отвори базените, хотелите, терените за голф, кината на отворено... Со полна пареа се подготвуваат за отворање на туристичката сезона која ќе започне за две недели.
Благодарение на строгите мерки коишто ги воведоа за да го спречат ширењето на коронавирусот, Грција има мал процент на заразени, а починаа 175 луѓе поради компликации предизвикани од COVID-19.
По средношколците, денеска во училишните клупи се враќаат и учениците од основните училишта, а се отвораат и градинките.
Паралелно Грција полека почнува да се подготвува за отворање на хотелите што работат во текот на целата година, како и на камповите.
Грците од денеска ќе можат да уживаат во кината на отворено, но и да земат книги од библиотеките.
Се укинуваат и сите ограничувањата во однос на возраста за тренирање на спортистите на отворените спортски терени, од денеска е дозволена употреба и на соблекувалните, додека пак за викендот дозволен е почеток и на натпревари, но без присуство на публика.
Од денеска започнуваат со работа и кетеринг службите, студијата за тетовирање и дел од судовите.
Дополнително, во следните пет месеци, се намалува ДДВ-то на јавниот, автобускиот, бродскиот, авионскиот и железничкиот превоз, како и на кафињата и безалкохолните пијалаци и влезниците за кино.