Шведската климатска активистка Грета Тунберг (21) е казнета поради протестите во Стокхолм, пишува Associated Press.
Судот ѝ нареди да плати казна од 6.000 шведски круни, што е сума од 512 евра.
Тунберг е обвинета дека ги игнорирала полициските наредби да ги напушти двата протеста пред шведскиот парламент во март, повикувајќи на акција за климатските промени.
Активистката беше обвинета по две точки за граѓанска непослушност, а таа на суд ги отфрли обвиненијата.
„Не сакав да го напуштам протестот поради климатската вонредна состојба, а во вонредна состојба сите имаме должност да дејствуваме. Сегашните закони ги штитат екстрактивните индустрии наместо да ги штитат луѓето и планетата“, рече 21-годишната активистка во судницата.
Во март, Тунберг учествуваше во серија повеќедневни протести кои вклучија неколку блокади на главниот влез на зградата на шведскиот парламент.
На 12 и 14 март полицијата ја отстрани активистката од местото на настанот, откако таа одби да го напушти местото.
Политичарите сепак можеа да влезат во зградата на парламентот преку споредните влезови. Шведските судови веќе ја имаат казнето Тунберг двапати за граѓанска непослушност за време на протести за климата.
Движењето „Петоци за иднината“ се роди откако Тунберг, тогаш само 15-годишна, не одеше на часови во петоци во август 2018 година за да организира протест пред шведскиот парламент, држејќи натпис на кој пишуваше „Skolstrejk för klimatet“ („Школски штрајк за климата“).
Оттогаш, милиони ученици и студенти ширум светот го следеа нејзиното водство, оправдувајќи го своето отсуство од училиште со нагласување на виталната важност од преземање акција за да се спречи глобалното затоплување да го загрози животот на Земјата.