Холандската пиварница Heineken објави драстичен пад на профитот и приходите во 2020 година.
Компанијата најави и бавно закрепнување од последиците од пандемијата на коронавирус во 2021 година и елиминирање на околу 8.000 работни места за намалување на трошоците.
Нето-приходот на вториот најголем производител на пиво во светот падна за 12% во пандемиската година, на 19,7 милијарди евра.
Оперативната добивка потона 35,6 проценти на 2,4 милијарди евра. Нето добивката беше скоро преполовена, на 1,1 милијарда евра.
Консолидираната продажба на пиво падна за 8,1 процент, поради негативното влијание на обновените рестриктивни мерки за заштита од COVID-19 врз резултатите од четвртиот квартал, особено во Европа, каде што затворија рестораните.
Извршниот директор Долфт ван ден Бринк е претпазлив во своите прогнози, иако тој смета дека програмите за вакцинација против корона во Европа, Северна Америка и некои поразвиени азиски земји ќе овозможат враќање во нормала, по тешката 2020 година.
„Ние сме глобална компанија ... Само кога целиот свет е вакциниран до одредена мера, можеме да кажеме дека сме се извлекле“, објаснува Ван ден Бринк.
Компанијата сака да заштеди две милијарди евра до 2023 година со реорганизација, намалување на опсегот и поефикасно трошење.
Прегледот на деловната активност откри дека компанијата треба да скрати околу 8.000 работни места или 9% од работната сила до крајот на 2019 година, што ќе значи намалување на 420 милиони евра во трошоци.
Трошоците за вработените треба да се намалат за околу 350 милиони евра со отпуштањата.
Компанијата има намера да се фокусира на зајакнување на премиум брендовите како што се Heineken и безалкохолниот лагер. Исто така, има за цел да стане најдобра дигитално поврзана пиварница, која на потрошувачите ќе им понуди пиво преку интернет.
Тие очекуваат условите на пазарот постепено да се подобруваат оваа година и, поизразено, следната година, поддржани од бавното закрепнување на баровите и рестораните во Европа.
Тие очекуваат нивните приходи, оперативната добивка и маржата да бидат пониски оваа година отколку во 2019 година.
