Еквадорскиот играч за врска Моисес Каиседо стана најскапиот играч во историјата на фудбалот на Островот, а од неговиот трансфер нема да заработи само клубот од кој заминува, Брајтон.
Каиседо (21) се договори за трансфер во Челси за нешто повеќе од 133 милиони евра. Тоа е апсолутен рекорд во англискиот фудбал, па така Брајтон продолжи со одличните трансфери од кои клубот живее со години и напредува од сезона во сезона.
Сепак, приказната за неговиот поранешен клуб го обиколи светот. Нема да заработи само Брајтон, туку и неговиот матичен клуб Индепендиенте дел Ваље, клубот од Еквадор од каде Каиседо замина во Европа и почна да гради голема кариера.
Индепендиенте дел Ваље ќе заработи неверојатни пари. Со оглед на тоа што Каиседо таму ја започна својата кариера, еквадорскиот клуб ќе добие дури 27 милиони евра, што е импресивна сума за екипа која не заработува толку пари дури и кога ќе се соберат повеќегодишни трансфер периоди.
Според првите информации, Индепендиенте дел Ваље парите ќе ги искористи за изградба на нов тренинг комплекс на клубот, но и за развој на тимот за да има нови играчи кои би можеле да направат големи кариери во странство. Клубот има свој стадион „Банко Гуајанкил“ со капацитет од 12.000. Иако клубот е од Санголки, предградие на престолнината Кито, новиот комплекс ќе биде 133 км западно, во градот Санто Доминго.
Индепендиенте дел Ваље се етаблираше последнава деценија, но на Стариот континент сѐ уште ретко кој слушнал за него, настрана оние што играат кладилница или ретките што седат до доцна во ноќта за да гледаат Копа Либертадорес. Долгогодишен нисколигаш, иако формиран во 1958 година, Индепендиенте дел Ваље прв пат заигра во најдобрата лига на Еквадор во сезоната 2010. Оттогаш е еден од најдобрите клубови во земјата. Во 2013 заврши втор, а титулата конечно ја освои во сезоната 2021. Наредната 2022 го освои купот, а годинава и суперкупот. Од 2014 е редовен учесник во Копа Либертадорес или во Копа Судамерикана. Во 2016 играше финале во Либертадорес и во двомечот загуби од колумбискиот Атлетико Насионал (1:1, 0:1)., Затоа пак, потоа во 2019 и 2022 ја освои Судамерикана, а годинава и јужноамериканскиот суперкуп изненадувајќи го бразилскиот великан Фламенгу на пенали.
