Третото најголемо стопанство во светот се намали за 0,9 отсто во периодот од јануари до март во споредба со претходниот квартал, соопшти денеска јапонската влада.
Овој пад е уште подраматичен ако се разгледува на годишно ниво – 3,4 отсто.
Соопштените резултати се нешто подобри од прогнозираните – во својата анализа Refinitiv прогнозираше пад од 1,2%. Сепак, падот е доволно голем за да се смета дека Јапонија влезе во рецесија.
Јапонското стопанство имаше проблеми и пред избивањето на заразата. Економската активност се намали минатата годиниа откако државата го „впи“ зголемениот данок на промет. Дополнителен проблем направи тајфунот Хагибис кој го замрзна стопанството и влијаеше на последниот пад.
Аналитичарите објаснуваат дека поради подоцното доаѓање на епидемијата во Јапонија, на земјата допрва ѝ следи најлошото. Тие сметаат дека епидемијата влијаела на падот само во март.
Како и многу други земји погодени од вирусот, и Јапонија беше приморана да ги затвори приватните бизниси, продавниците и дел од производството, што секако влијаеше врз економската активност. Приватната потрошувачка, што сочинува половина од јапонското стопанство, уште пред прогласувањето на вонредната состојба во земјата и затворањето на границите, падна за 0,7%.
Поради сево ова, аналитичарот Том Лирмаут проценува дека април и мај ќе бидат уште полоши.
Минатата недела и Германија влезе во рецесија. Германското стопанство доживеа пад за 2,2 отсто во првиот квартал од оваа година, што е најголем пад од финансиската криза во 2009 година, покажаа податоците објавени на 15 мај. Фабриките и продавниците ширум Германија беа затворени во март со цел да се спречи ширењето на коронавирусот.
