Меколи Калкин, кој глумеше во првите два дела од култниот филм „Home Alone“ („Сам дома“), побара американскиот претседател Доналд Трамп да биде изоставен од сцената во која се појавува во вториот дел од франшизата.
Актерот на тој начин ги поддржа оние кои претходно бараа отстранување на сцената со Трамп. Барањата следеа откако приврзаниците на Трамп насилно влегоа во Конгресот, а Калкин објави поддршка на Twitter.
Трамп на кратко се појавува во сцена заедно со Калкин во второто продолжение на многу популарниот филм од 1992 година, во кој Калкин го играше момчето Кевин.
На објавата на Twitter „Петиција да се замени Трамп во Home Alone 2 со Меколи Калкин на 40 години“, актерот напиша: „Продадено“.
На истата социјална мрежа беше објавена сцената во која игра Трамп, но е „избришан“, што Калкин го коментираше со „Браво“.
Режисерот на филмот Крис Колумбос откри дека Трамп „сосила стана дел од филмот“ додека снимале во неговиот хотел.
„Плативме надомест, но тој ми рече: ‘Единствениот начин да снимате во хотелот Plaza е јас да се појавам во филмот.’ Така, се согласивме да биде дел од филмот. Кога филмот беше првпат прикажан, се случи нешто чудно – на луѓето им беше мило што го гледаат. Затоа и реков да го оставиме во филмот, тоа беше момент за публиката“, изјави Колумбос за Independent.
