Фудбалскиот клуб Работнички реагираше на одлуката на Советот на Град Скопје за финансиската помош од 15 милиони денари за ФК Вардар, како помош на клубот за исплата на задоцнетите плати за фудбалерите. Од Работнички порачаа дека немаат ништо против помошта што Град Скопје му ја доделува на Вардар, но потенцираа дека се заборавени останатите клубови од главниот град.
„ФК Работнички е фудбалски бренд од метрополата и Македонија воопшто, клуб формиран далечната 1937 година кој гордо го носи епитетот Херојот од Дебар Маало. Оттаму сметаме дека Град Скопје треба да смогне сили и да најде начин да ги помага и другите клубови, посебно прволигашите кои имаат и европско педигре“, порачува клубот од Дебар Маало кој е цели 10 гоидини постар од Вардар.
Токму Работнички во последнава декада поради намалените финансии не е оној Работнички што освојуваше титули и играше во Европа. Клубот изминативе сезони се бори за опстанок, веќе и грчевито.
„Во овој тежок период и останатите фудбалски клубови во Македонија имаат тешкотии во финансирањето, а ФК Работнички е единствениот клуб од Скопје кој своите натпревари ги игра на арената 'Тодор Проески' и одвојува значителни средства за таа намена. Би сакале да напоменеме дека ФК Работнички не е против одлуката да биде помогнат ФК Вардар, но не смее да биде само еден клуб привилегиран на сметка на сите останати. ФК Работнички во последните 15 години нема добиено никаква помош од Град Скопје или било која друга градска институција“, вели извршниот директор на Работнички, Иван Поповски.
Претходно и од таборот на чаирски Шкупи се побунија за помошта која ја доби само Вардар.
