Сега е официјално - Microsoft нема да може уште долго да ги држи цените на своите конзоли и услуги.
За време на последните неколку месеци видовме дека многу компании ги креваат цените на своите производи поради проблемите во ланецот на снабдување, но и економските проблеми со кои се соочува целиот свет. Кога е во прашање пазарот на гејминг конзоли, се чини дека Microsoft е следната компанија што ќе го направи тоа поскапување.
Шефот на Xbox, Фил Спенсер, во разговор за The Wall Street Journal рече дека верува дека Xbox производите и услугите во иднина ќе поскапат.
„Мислам дека во еден момент ќе мораме да ги покачиме цените на одредени производи, но сметаме дека е важно да се одржат цените до празничниот период. Ги задржавме цените на нашите конзоли, ги задржавме цените на нашите игрици и претплата - мислам дека тоа нема да можеме вечно да го правиме. Мислам дека во еден момент ќе мораме одредени цени да ги покачиме“, рече тој.
Иако Спенсер не прецизираше точно кои производи и услуги би можеле да поскапат, можеме да бидеме сигурни дека неговиот одговор се однесува на Xbox Game Pass и Xbox Live Gold претплатите, особено ако земеме во обѕир дека другите претплатнички сервиси го прават истото.
Сепак, доколку навистина видиме покачени цени на конзолите Xbox Series S/X, тоа нема да биде првото поскапување на пазарот на гејминг конзолите - Sony уште во август најави дека PlayStation 5 ќе поскапи во одредени региони, меѓу кои е и Европа,
За среќа, оние кои сакаат да си купат конзола Xbox Series S/X имаат уште малку време тоа да го сторат по оригиналната цена - се разбира, доколку воопшто можат да ја најдат во продажба.
