Ако ја сакате италијанската кујна, тогаш сте и љубител на лазањи, па овој едноставен рецепт без досадното редење слоеви ќе ве одушеви.
Без готвење бешамел сос, и исто толку вкусно како вистинските - никогаш не било полесно да се направат лазањи.
Лазањите се едно од најпопуларните јадења во италијанската кујна, но зад нив не заостануваат ниту пицата, шпагетите болоњезе или карбонара... Се прават така што меѓу корите се редат слоеви пржено мелено месо, па бешамел сос и на крај се посипуваат со пармезан. Сето ова се пече во рерна и лазањите се готови. Секако, меленото месо и бешамелот можете да ги замените со други филови и сосови, по ваша желба.
Првиот пишан италијански рецепт за лазања е откриен во анонимен ракопис од XIV век пронајден во близина на Неапол. Според овој рецепт, тие се подготвувале на следниов начин: листовите тесто се вареле во врела вода, а потоа се посипувале со зачини и рендан кашкавал. Зачините најверојатно вклучувале сол, бибер и шеќер, но можеби и комбинација од цимет, каранфилче, морско оревче и шафран. Ви предлагаме рецепт за поедноставна лазања кој се прави без слоевитост, па е идеална за оние кои брзаат и сакаат квалитетна и вкусна храна.
- 1 кромид
- 2 чешниња лук
- 600 гр месо
- 1 пакување кори за лазањи
- оригано
- ½ литар сос од домати
- 200 гр печурки
За запршката:
- 1 лажица брашно
- 200 мл павлака за готвење
- 220 гр сирење
- малку пармезан
На малку масло продинстајте го кромидот, потоа додадете ги сечканите печурки и лукот, а кога и тоа ќе продинста додадете го меленото месо. Добро измешајте, посолете, побиберете и пропржете. Откако ќе се испржи месото се прелива со сос од домати, една шолја вода, се посипува со оригано, се меша и се додаваат искршените кори од лазањи. Повторно добро измешајте за да не се залепат. Покријте и варете додека не омекнат. Одвреме-навреме проверувајте дали има недостаток на течност и доколку недостасува, додадете вода. Во сад измешајте ги брашното, павлаката за готвење и ренданото сирење. Добро измешајте и додадете во тавата и повторно промешајте. Посипете со пармезан и печете на 180°C околу 40 минути.
