Ново истражување на шведскиот Институт Каролинска и Универзитетската болница Каролинска покажа дека многу луѓе со благи симптоми или без симптоми на коронавирус имаат имунитет.
Истражувачите веруваат дека човечкиот имунитет е поголем од тој што го сугерираат тестовите на антитела.
„Т-клетките се вид бели крвни клетки специјализирани за препознавање клетки заразени со вирус и се важен дел од имунолошкиот систем. Напредните анализи овозможија детално да го мапираме одговорот на Т-клетките за време и по инфекцијата со коронавирусот. Нашите резултати покажаа дека отприлика двојно повеќе луѓе развиле имунитет на Т-клетки во споредба со оние кај кои можеме да утврдиме антитела“, изјави Маркус Бугерт, доцент на Центарот за инфективна медицина при Институтот Каролинска и еден од главните автори на студијата.
Во оваа студија објавени се имунолошките анализи на повеќе од 200 луѓе од кои многумина имале благи или воопшто немале симптоми. Станува збор за пациенти на Универзитетската болница Каролинска и други пациенти. Вклучени се и здрави дарители на крв, како и пациенти со тешка клиничка слика, кои развиле силен имунолошки одговор.
„Нашите резултати покажуваат дека јавниот имунитет на COVID-19 веројатно е поголем од тој што го сугерираат тестовите на антитела. Тоа е многу добра вест од перспектива на јавното здравје“, вели професор Ханс Густаф Лунгрен од Центарот за инфективна медицина.
Резултатите од ова најново истражување не се минати низ стручна проверка. Додека се чека на рецензија, студијата е објавена на официјалната страница на Институтот Каролинска.
