Новиот предводник на италијанскиот шампион признава дека не можеле ни да помислат на подобар старт на новата сезона откако синоќа ја средија Џеноа со убедливи 4:0.
„Бев прилично убеден дека тимот ќе одигра добро бидејќи ги гледав како тренираат со ентузијазам уште од 8 јули, гладни да научат нови концепти. Не можевме ни да посакаме подобар старт, особено не пред нашите навивачи кои беа назад на трибините“, вели Симоне Инѕаги говорејќи за DAZN.
Тој седна на клупата на Интер веднаш по завршувањето на ланската сезона менувајќи го Антонио Конте кој заврши одлична работа носејќи му го на клубот првото Скудето после 11-годишен пост.
„Беше интересно да се гледа овој тим. Стефано Сенси не ја играше својата препознатлива улога, но тој беше толку добар на тренинзите што едноставно морав некаде да му најдам место. Мора да продолжиме во ист стил“, додаде тој.
Синоќа Интер во почетните единаесет настапи со двајца дебитанти: Хакан Чалханолу, кој дојде од Милан, и Един Џеко од Рома. И двајцата постигнаа гол. Прво Милан Шкриниар во 6. минута го отвори резултатот, потоа Чалханолу во 14-тата дуплираше, Артуро Видал во 74. минута погоди за 3:0, а Џеко на три минути пред крајот ја запечати победата. Чалханолу и Џеко запишаа и по едан асистенција за првите два гола.
За Џеноа 90 минути на теренот одигра Горан Пандев.
„Чалханолу е одличен играч, способен да ги обедини квалитетот и квантитетот. Тој претрча многу за тимот. Секогаш кога играв против него ми создаваше многу проблеми. Среќни сме што го доведовме и верувам дека ќе стане уште подобар бидејќи тој не ни сфаќа колку добар навистина е“, заврши Инѕаги.
Наредниот предизвик за Интер е в петок вечер од 20:45 кога гостува кај Верона.
