Советникот за национална безбедност на Белата куќа Џејк Саливан изјави дека Соединетите Американски Држави имаат информации за тоа како Иран планира да обезбеди значителна воена помош за Руската Федерација во наредниот период.
Според информациите достапни во Вашингтон, Иран планира да ѝ испорача на Русија стотици беспилотни летала кои оваа земја треба да ги користи во Украина.
„Иранската влада се подготвува да ѝ достави на Русија до неколку стотици беспилотни летала, вклучително и модели кои можат да носат оружје“, рече Саливан.
Тој исто така нагласи дека наскоро во Иран треба да се одржи обука на руските сили.
„Нашите информации покажуваат дека Иран се подготвува да ги обучи руските сили за користење на овие беспилотни летала, а почетната обука треба да започне веќе во јули“, нагласи Белата куќа.
Меѓу другото, Саливан појасни дека ирански беспилотни летала веќе се користени на одредени боишта, што првенствено се однесува на Јемен, каде што бунтовниците Хути досега ги користеле кога планирале напади врз Саудиска Арабија.
Кога станува збор за украинската страна, Белата куќа појасни дека украинските сили имале значителен успех во користењето борбени беспилотни летала Bayraktar, додека САД и другите сојузници го снабдувале Киев со дронови за други цели.
„Од наша перспектива, ние ќе продолжиме да го даваме нашиот дел за да помогнеме да се одржи ефикасна одбрана на Украина и да им помогнеме да им покажеме на Украинците дека руските напори и обиди да ја избрише земјата од мапата нема да успеат“, рече Џејк Саливан.