Соочена со четвртиот бран на инфекции со коронавирус, Италија ги заостри мерките за заштита од коронавирус и ја прошири обврската за вакцинирање.
Владата вчера одобри декрет според кој правилата кои бараат доказ за вакцинација или прележан ковид ќе важат за поголемиот дел од јавниот живот од 6 декември.
Од 6.12. нема влез во барови, ресторани и настани без вакцинација или доказ за прележан ковид.
Приемот во барови, ресторани или настани ќе зависи од можноста да се покаже тој доказ.
Овие мерки ќе се спроведуваат низ целата земја до 15 јануари. Потоа, мерките ќе важат само за регионите кои се прогласени за корона зони и каде ќе бидат потребни построги правила.
Од 15 декември, луѓето кои работат во училиштата, како и полицајците, војниците, спасувачите и вработените во здравствената управа, мора да се вакцинираат против COVID-19.
Здравствените работници, кои требаше да се вакцинираат од април, ќе мора да примат трета доза од вакцината.
Новите правила ќе им го отежнат животот на невакцинираните.
Од 15 октомври, на работните места во Италија се на сила мерките кои бараат доказ за вакцинација, негативен тест за коронавирус или доказ за прележана болест.
Истите правила досега важеа само за патување на долги релации, но ќе бидат проширени и на хотелите, локалниот јавен превоз и регионалниот железнички превоз.
Валидноста на италијанската дигитална зелена карта - потврда за вакцинација или прележан ковид - ќе биде скратена од 12 на 9 месеци.
Италија неодамна забележа значително зголемување на случаите на коронавирус. Вчера, здравствените власти регистрираа скоро 12.500 нови случаи на инфекција и 85 смртни случаи за 24 часа.
