Израел одобри потенцијален напад врз градот Рафа во Појасот Газа, но во исто време планира да испрати втора делегација во Катар за да преговара за евентуален договор за прекин на огнот со исламистичката милитантна група Хамас во замена за ослободување на заложниците.
Кабинетот на израелскиот премиер Бенјамин Нетанјаху соопшти дека тој го одобрил планот за напад на градот во најјужниот дел на опустошената палестинска енклава, каде што повеќе од половина од неговите 2,3 милиони жители се засолниле по пет месеци борби.
Глобалните сојузници и критичари го повикаа Нетанјаху да го одложи нападот на Рафа поради страв од масовни цивилни жртви. Но, Израел тврди дека тоа е едно од последните упоришта на Хамас, кое вети дека ќе го уништи, и вели дека жителите ќе бидат евакуирани.
Портпаролот на Белата куќа Џон Кирби изјави дека Вашингтон не го видел планот за напад на Рафа, но би сакал. На редовниот брифинг тој рече дека е изводлив предлогот на Хамас за прекин на огнот во замена за ослободување на заложниците и изрази внимателен оптимизам.
Хамас им претстави на посредниците и на САД предлог за договор за прекин на огнот во Газа, кој вклучува ослободување на израелските заложници во замена за слободата на палестинските затвореници, од кои 100 отслужуваат доживотна казна, според предлогот што го видел Reuters.
Според соопштението од канцеларијата на Нетанјаху за планот за напад на Рафа, барањата на Хамас за ослободување на заложниците остануваат нереални, но сепак израелска делегација ќе замине во Доха откако безбедносниот кабинет ќе разговара за нејзиниот став.
Израелските одбранбени сили „се подготвуваат оперативно и за евакуација на населението“ од градот Рафа, се вели во соопштението. Во соопштението за медиумите не се споменува временска рамка, ниту пак се појавија докази за дополнителни подготовки на теренот.
Американскиот државен секретар Антони Блинкен им рече на новинарите во Австрија дека САД треба да видат јасен и остварлив израелски план за Рафа, кој ќе ги заштити цивилите од опасност.
