Израел го потврди присуството на новата варијанта на коронавирус

Министерството за здравство во Израел соопшти дека во земјата е присутна новата варијанта на коронавирус наречена Б.1.1.529, пренесе The Jerusalem Post.

Новата варијанта е откриена кај лице кое се вратило во Израел од африканската држава Малави. Докторите истражуваат уште два случаи на повратници од странство, сомнителни дека се заразени со новата варијанта. Во тек е генетско секвенционирање и резултатите се очекуваат наскоро.

Во сите три случаи станува збор за патници кои се вакцинирани.

За каква варијанта станува збор?

Се работи за варијанта на коронавирусот забележана во Јужноафриканска Република, Боцвана и Хонгконг. Наречена е Б.1.1.529 и има дури 32 мутации кои можеби ќе овозможат да се избегне имунитет стекнат со вакцини и прележување.

Засега се идентификувани мал број случаи, но можно е да постојат многу повеќе. Сосема е можно вообичаените тестови за другите соеви да не можат успешно да ја препознаат присутноста на оваа варијанта. Сите случаи, вклучително и оној во Хонгконг, се поврзани со Африка.