Ставре Јада утринава успеа да го оствари она што го најави - да стане првиот македонски скијач кој комплетирал маратон на зимска Олимпијада.
Мора да се напомене и дека трката наместо на 50 километри беше смалена на 30 километри откако поради ниските температури и силниот ветер организаторите прво го одложија стартот за еден час, а потоа и ја скратија трката.
Јада на крајот заврши на 56. место од 59 натпреварувачи кои ја завршија трката (двајца останаа без пласман). Тој оствари време од 1:25:41,8 и заостана 14:09,1 минути зад победникот, Русинот Александр Болшунов (1:11:32,7).
Среброто замина кај Иван Јакимушкин од Русија, додека бронзата кај Симен Хегстад Кригер од Норвешка.
Нашиот натпреварувач од претходно изјави дека целта во оваа крос-кантри дисциплина нема да му биде остварување резултат, туку завршување на трката, нешто кое му немаше појдено од рака на ниту еден наш олимпиец. Ставре успеа во намерата, остварувајќи го ветеното. Сепак, бидејќи трката не беше според предвидените 50 километри, иако дисциплината и натаму официјално го носи тоа име, мора да напоменеме дека 30 километри на ЗОИ 2002 помина и Ѓоко Динески.
„Горди сме на најдобрите македонски спортисти кои дадоа сѐ од себе на Зимските олимписки игри во Пекинг, Кина и им посакуваме, со заедничка квалитетна и напорна работа, на следните Зимски олимписки игри во Милано-Кортина 2026 да постигнат уште подобри резултати“, објави МОК по завршувањето на трката на Јада.