Поранешниот словенечки премиер Јанез Јанша го коментираше воведувањето гранични контроли на словенечките гранични премини и воопшто за мигрантската криза и ги повика Словенците да се вооружат.
„Ѓаволот ја однесе шегата. Наоружајте се. Легално“, го започнува својот повик Јанша на социјалната мрежа Х (поранешен Twitter).
Тој додава дека паметните го разбрале повикот, а другите „ќе им веруваат на Голоб, Поклукар и Шарац дека се способни да ја заштитат Словенија, но и нив лично во случај на терористички напади“.
Јанша наведува дека станува збор за државни функционери кои од јуни ги игнорираат повиците на Словенечката демократска партија (SDS) - на чело со Јанша - да се свика Советот за национална безбедност, на кој ќе се расправа за мерките за борба против илегалната миграција и управување со безбедносните ризици.
„Тие ја урнаа оградата, а сега, кога во паника повторно воведоа контрола на границата со соседите, само го пренасочуваат протокот на илегалци од патишта во вагони“, додаде Јанша.
Тој го прозва и актуелниот министер за одбрана Марјан Шарац, наведувајќи дека тој го води неговиот ресор како реално шоу.
Јанша наведува дека светот се променил во последната деценија и дека се поткопани вредносните основи на западната цивилизација.
„Притисокот на масовната илегална миграција радикално го уништува постоечкиот начин на живот во ЕУ и ги зајакнува милитантните, протерористички јадра во европските метрополи. Некогаш безбедните и успешни градови бележат невиден пораст на криминал. Во нив, за жал, се вбројува и Љубљана.
„Последниот упад на палестинските терористи во Израел уште еднаш потврди колку е важно народот да биде добро и легално вооружен“, додаде тој.
На крајот од објавата Јанша подвлекува три работи и го повторува повикот до Словенците да се вооружат.
„На секој писмен човек денес му се јасни три работи:
1. Со голема веројатност може да очекуваме заострување на безбедносната состојба.
2. Сегашната гарнитура на власт не е ни приближно способна за навремени проценки, подготовки и активности.
3. Секој е должен да направи сè што е можно во рамките на уставниот поредок за да ги заштити семејството и татковината.
Затоа: Ѓаволот ја однесе шегата. Вооружете се. Легално“, се вели во објавата на Јанша.