Јапонската компанија Fujifilm соопшти дека нејзиниот лек авиган, веќе одобрен за тежок грип, овозможи „статистички значајно“ намалување на времето на лекување на пациентите со COVID-19.
„Од 156 пациенти вклучени во клиничкото испитување во трета фаза во Јапонија, просечното времетраење на опоравувањето е 11,9 дена за оние кои се лекуваат со авиган и 14,7 дена за оние кои се лекуваат со плацебо“, се наведува во соопштението на компанијата.
Излекувањето се одредува кога коронавирусот повеќе не е присутен на ПЦР тестови и кога другите симптоми како што е температурата се ублажени или исчезнати.
Клиничкото тестирање беше насочено кон пациенти со лесна пневмонија поврзана со COVID-19.
Испитувањата спроведени од март, сега завршени, не открија никакви нови опасности по здравјето поврзани со земање авиган, прецизира Fujifilm.
Компанијата сега ќе спроведе „детална анализа на податоците“ собрани за време на тестирањето и очекува во октомври да достави барање за комерцијално одобрување на лекот за COVID-19 во Јапонија.
Лекот авиган (фавипиравир) е дозволен од 2014 година во Јапонија, но само за третман на тешки случаи на грип кога стандардните лекови не биле ефикасни.
Авиган е контраиндициран за бремени жени, бидејќи тестови врз животни покажаа дека влијае на развојот на фетусот.
Јапонската Влада очекува многу од овој лек и побара од Fujifilm да го зголеми производството и да испорача бесплатни примероци во некои земји што го побараа.
Уште во мај, Јапонија го одобри лекот веклури (ремдесивир) на американскиот производител „Гилеад“.
