Античките Римјани ја ширеле својата култура во скоро секој дел каде што успеавале да стапнат, а денес ширум Европа, Северна Африка и Блискиот Исток има купишта нивни остатоци од кој најпознати се театрите и амфитеатрите.
Разликата помеѓу театар и амфитеатар е во самиот изглед и големина. Римските театри имаат полукружна форма со седишта кои гледаат на сцената, додека амфитеатрите се округли каде сцената е на средина, а околу неа е публиката. На пример, она што го имаме во Охрид е театар, додека Колосеумот во Рим е амфитеатар.
Зборот театар потекнува од грчкиот збор θέατρον што значи „место за гледање“, додека додавката амфи е исто така од старогрчкиот јазик и тоа од зборот ἀμφί со значење „округло“ или „двострано“.
Најмногу театри и амфитеатри Римјаните изградиле на територијата на денешна Франција, дури 51. Барем толку се откриени. Следува Тунис со 38 пред Турција со 36 и Шпанија со 29. Тоа се земјите каде Римјаните најмногу граделе, не сметајќи ја територијата на Италија каде, нормално, има најмногу, недостижни 141.
На територијата на Македонија има вкупно 4 и сите се театри. Ги има во Лихнид (Охрид), Хераклеја (Битола), Скупи (Скопје) и Стоби.
