Новооткриена комета се движи кон Земјата, а луѓето ширум светот ќе може да уживаат во прекрасното ноќно шоу што се случува еднаш во 7.000 години, соопшти НАСА.
Кометата Неовајс, најсветлата комета видлива од северната хемисфера последниве 25 години, влезе во орбитата на Меркур пред околу една недела.
Близината на Сонцето и топлината направија нејзината опашка да биде уште подолга и уште посветла. Кометата со дијаметар од околу пет километри, ќе мине крај Земјата, а најблиску до нас ќе биде на 23 јули.
НАСА ја откри оваа комета во март. Нејзиното јадро е покриено со слоеви материјал кој датира од почетоците на нашиот Сончев систем, пред околу 4,6 милијарди години.
Џо Масјеро од НАСА истакнува дека ова е најсветлата комета видена од средината на 90-тите досега. Астронаутите од Меѓународната вселенска станица веќе успеаја да ја разгледаат подетално. Боб Бенкен од НАСА сподели и фотографија од неа.
Можете да го најдете точното место на кометата со користење специјализирани смартфон апликации со интерактивни мапи од соѕвездијата.
Иако е видлива со голо око, кометата сè уште е слаба, така што и двоглед би завршил добра работа.
Од вчера, 12 јули, кометата е видлива и во вечерните часови. Околу еден час по зајдисонце ќе се појави во близина на северозападниот хоризонт. Како што поминува месецов, таа ќе се издигне повисоко на небото. На 23 јули кометата ќе стигне до најблиската точка до Земјата на оддалеченост од 103 милиони километри, пред да продолжи со својот космички лет.
По оваа средба, астрономите очекуваат кометата да ја нема одреден период. Се проценува дека луѓето на Земјата следен пат ќе ја видат во 8786 година.
