Доколку имате проблеми со спиењето, веројатно веќе ги имате слушнато советите како оној дека спалната соба треба да биде темна, ладна и тивка. Но, експертите за спиење тврдат дека постои уште нешто што можете да го направите за подобар сон - од собата да ги отстраните часовниците.
Објаснуваат дека „сознанието дека е веќе 2:35 наутро“, а вие уште не можете да заспиете никако нема да ви помогне, а може само уште повеќе да ве разбуди и да ви го одложи времето на заспивање, пишува Mind Body Green.
Тоа го потврдува и истражувањето од 2007 година објавено во Journal of Behavior Therapy and Experimental Psychiatry во кое 30 луѓе со добри навики за спиење и други 30 со несоница добиле наредба една ноќ да се обидат да заспијат пратејќи или непратејќи го часовникот, како што самите ќе одлучат, со тоа што сите носеле со себе преносен монитор за пратење на спиењето.
„Во споредба со оние кои не го прателе времето на часовникот, оние кои цело време проверувале колку е часот повеќе биле загрижени и имале подолга латентност при почетокот на сонот“, рекол тогаш еден член на истражувачкиот тим и додал дека истото важело и кај оние со квалитетен сон и кај тие со несоница.
Во подоцнежна студија која се фокусирала само на оние кои лошо спијат и го проширила опсегот на истражувањето на три ноќи наместо на една, часовникот и натаму бил главен извор на загриженост, па истражувачкиот тим заклучил дека часовниците поттикнуваат грижа поврзана со спиењето и објасни дека часовникот или будилникот никако не би требало да стојат во близина на креветот.
Можеби ќе ви биде полесно да заспиете без она непрестајно отркуцување, но и помалку ќе се грижите за тоа колку дошол часот. Експертите потсетуваат и дека нашите тела се програмирани за спиење и тоа го прават инстинктивно.
„Ако минат повеќе од 20 минути и сѐ уште сте будни, станувањето да правите нешто друго додека не осетите дека сте поуморни може да помогне. На тој начин нема креветот да го поврзувате со несоница и ќе остане ваша зона за одмор; но, немојте ни кога ќе излезете од собата да проверувате колку е часот“, советува психологот Елен Вора.
Нормално, не треба ниту часовникот на вашиот мобилен телефон да го проверувате. Всушност, мобилниот воопшто и не треба да го допирате штом си легнете.