Итно се потребни нови глобални правила за борба против климатските миграции и регулирање на новите геоинженерски технологии, предупредија денеска воени и безбедносни претставници.
„Без координирана политика за обете прашања, светот ризикува повеќе конфликти без никаков механизам за нивно меѓународно решавање“, рече Ерин Сикорски, заменик-директорка на Центарот за клима и безбедност со седиште во Вашингтон.
„Таканаречените соларни геоинженеринг техники, во кои честичките можат да се распрснат во стратосферата на планетата за да пренасочат повеќе сончева светлина од загреаната Земја, се особено загрижувачки“, изјави Сикорски пред Фондацијата Томсон.
Ова прашање сѐ повеќе се појавува во разговорите со безбедносните експерти, додаде таа во телефонскиот разговор.
Експертите од Меѓународниот совет за воена клима и безбедност (IMCCS) во извештајот објавен денеска повикаа на побрзи мерки за борба против емисиите кои предизвикуваат глобално затоплување и поголеми напори за справување со последиците од климатските промени.
„Зголемениот интензитет на климатските закани ќе ги оптовари воените и безбедносните служби ширум светот, бидејќи тие се повикани да одговорат на климатските кризи“, предупреди IMCCS.
Тие додадоа дека „инфраструктурата на војската е сѐ повеќе изложена на ризик од климатски влијанија како што се покачување на нивото на морето и влошување на временските непогоди“.
Од рекордна суша во западниот дел на САД до силни урагани и циклони ширум светот, како и зголемување на миграциите кон Централна Америка поврзани со бури и неуспешните посеви, климатските влијанија претставуваат голем безбедносен ризик, се вели во извештајот на IMCCS.
„Климатските промени веќе не претставуваат иден ризик што ќе се случи со децении отсега, бидејќи температурите на затоплување и влијанието на климата веќе активно го обликуваат безбедносното прашање за сите земји“, рече Кејт Гај, заменик-директорка на IMCCS.
Експертите посочуваат дека воените сили ширум светот сега се согласуваат дека климатските промени се безбедносен ризик, но дека чекорите за решавање на проблемот преку промени во развојната стратегија, дипломатијата и меѓународните договори за одбрана, само што започнале да се појавуваат.
„Реалниот број на спроведени мерки е мал“, рече Шери Гудман, генерален секретар на IMCCS, додавајќи дека „преминот од концептите за климатска безбедност кон имплементација е клучен и итен“.
Аналитичарите изразија надеж дека на состанокот на 14 јуни, земјите од НАТО може за прв пат да се согласат да продолжат со климатската програма насочена кон решавање клучни проблеми.
„Додека американскиот претседател Џо Бајден се залага за климатска акција, време е да ја прифатиме иницијативата и да не го пропуштиме овој момент“, рече Сикорски.
Таа додаде дека „климатските ризици почнуваат да се интегрираат во напорите за градење мир, со климатски советник назначен за мировната мисија во Сомалија и јазик за климатските промени во мировните договори во Западна Африка“.
Кога станува збор за подготовка за повеќе климатски миграции и особено за потенцијалното користење на геоинженерските технологии, според Сикорски „мора да ја охрабриме меѓународната заедница да разговара и да постигне договор.“
„И да го почнеме тоа - веднаш“, додаде таа.
