Рускиот претседател Владимир Путин, реагирајќи на изјавата на американскиот претседател Џо Бајден, на американскиот лидер му посака добро здравје.
„Што се однесува до изјавата на мојот американски колега, ние навистина се знаеме лично. Што би му одговорил? Би му рекол да е жив и здрав, му посакувам добро здравје“, изјави Путин во текот на состанокот со претставници од Крим и Севастопољ.
Тој додаде дека ова го кажува без иронија или како шега.
Рускиот претседател во врска со острите изјави на американскиот претседател рече дека сите ги гледаат другите онака како што се проценуваат себе.
„Ако гледаме пошироко на таа тема, во историјата на секој народ, секоја држава има многу тешки, драматични и крвави настани. Но, кога ги оценуваме другите или дури и кога ги проценуваме другите држави, другите народи, како секогаш да се гледаме во огледало. Секогаш таму се гледаме себеси. Бидејќи секогаш на другиот го префрламе тоа што самите го чувствуваме, тоа што сме во суштина“, нагласи Путин.
Според него, што се однесува до американскиот народ во целина, и таму има многу чесни, поштени и искрени луѓе кои сакаат да живеат во мир и во пријателство со Русија.
„Ние тоа го знаеме и во иднина ќе сметаме на нив“, вели рускиот претседател, пренесе Sputnik.
За потсетување, во интервју Џо Бајден на прашањето дали смета дека рускиот претседател е убиец, тој одговори „Да, го мислам тоа“.
