Во текот на август, Lada забележа раст на продажбата од дури 75 отсто во Русија, бидејќи владината програма за субвенционирање успеа да ја зголеми побарувачката во земјата.
Lada, која е дел од компанијата AvtoVAZ, забележа остар скок на продажбата во август, во прилично незгодно време за автомобилската индустрија во Русија, која е во длабоки неволји од почетокот на конфликтот во Украина.
Рускиот автомобилски бренд минатиот месец продаде вкупно 18.087 патнички автомобили, што е скок од 75 отсто во однос на јули. И додека продажбата е намалена за 7 отсто во однос на август минатата година, тоа е најдобрата месечна продажба на Lada откако Русија испрати десетици илјади војници во Украина во февруари.
Максим Соколов, претседател на AvtoVAZ, истакна дека продажбата на два модели на Lada, Grant и Niva, веќе го достигнала нивото пред оваа криза, што го означи како важен чекор за оваа компанија кон закрепнување.
Компанијата, која вработува околу 42.000 луѓе, рече дека владината програма за субвенционирање за помош за купување нови автомобили помогнала во зголемувањето на побарувачката. Рускиот автомобилски сектор, кој е силно зависен од странски делови и глобални синџири на снабдување, практично запре кога беа воведени санкциите кон Русија по инвазијата на Украина.
На пример, производството на автомобили во Русија падна за 97 отсто во мај, бидејќи многу компании, како што е AvtoVAZ, беа принудени да затворат фабрики и да им понудат на работниците отпремнини за да ја напуштат компанијата. Сепак, треба да се напомене дека автомобилите што моментално ги произведува Lada се всушност рудиментирани верзии, без бројна опрема како ABS, ESP, воздушни перничиња и електрични прозорци.
