Филмскиот фестивал во Кан започна синоќа со проекција на новиот филм на Џони Деп, Jeanne du Barry, во која актерот го игра кралот на Франција Луј Петнаесетти.
Кариерата на 59-годишниот холивудски актер е во пад и покрај неговата победа во судењето за клевета минатата година против поранешната сопруга Амбер Херд. Деп, сепак, постепено се враќа и, на црвениот тепих на премиерната вечер во Кан ја претстави француската драма за монархот од 18 век кој се вљубил во „обична жена“.
Претходно, директорот на фестивалот Тјери Фремо им рече на новинарите дека не е заинтересиран за судењето на Деп, додавајќи: „Јас сум заинтересиран за актерот Деп“.
Фестивалот на француската ривиера, кој ќе трае до 27 мај, вклучува голем број премиери, вклучувајќи го Indiana Jones and the Dial of Destiny, петти и најверојатно последен пат Харисон Форд во улогата на познатиот археолог.
Мартин Скорсезе во сабота ќе го претстави својот најнов филм Killers of the Flower Moon, заедно со ѕвездите Леонардо Дикаприо и Роберт де Ниро. На тој ден, публиката ќе ги види и Натали Портман и Џулиен Мур во независниот филм на Тод Хејнс May December.
Ѕвездите кои ќе појават на црвениот тепих во текот на оваа и следната недела се Бри Ларсон, Ума Турман, Натали Портман, Леонардо Дикаприо, Кејт Бланшет, Шон Пен, Алиша Викендер, Скарлет Јохансон, Катрин Денев (која го краси овогодинешниот фестивалски плакат) и Хелен Мирен.
Меѓу 21 филм кој се натпреваруваат за наградата „Златна палма“ има рекордни седум режисерки.
Оваа година, жирито го предводи шведскиот режисер Рубен Осланд, двократен добитник на „Златна палма“, кој минатата година се закити со главната награда за социјалната сатира Triangle of Sadness.
Мајкл Даглас присуствуваше на церемонијата на отворање каде ја доби почесната „Златна палма“.
„Постар сум од фестивалот“, изјави Даглас (78) по стоечките овации.
Даглас и Денев официјално го прогласија за отворен фестивалот на Азурниот брег, каде присутните ќе уживаат во колосална филмска ектравганца следните 12 дена.