Демонстрантите во Винипег турнаа повеќе споменици како знак на револт поради откривањето на стотици гробови на деца од домородно потекло.
За време на вчерашната прослава на популарниот Ден на Канада, односно денот кога на 1 јули 1867 година британските колонии Горна Канада, Долна Канада, Нова Шкотска и Њу Бранзвик го формирале тогашниот Доминион кој подоцна станал Канада, демонстрантите уште еднаш го искажаа гневот поради откривањето на стотици детски гробови за кои домородните Канаѓани ја обвинуваат католичката црква.
Училиштата во Канада порано биле најчесто под управа на католичката црква која ги принудувала децата на домородните народи да ги посетуваат со цел да бидат асимилирани и христијанизирани. Децата биле одвојувани од нивните родители за потоа да бидат „интегрирани“ со доселениците, но голем број починале од злоставување и негрижа. Судбината на многу такви деца со децении претставуваше мистерија, сѐ до пронаоѓањето на стотиците гробови изминативе месец дена.
Покрај споменикот на кралицата Елизабета II, турнат беше и поголемиот споменик на кралицата Викторија поставен во 1904 година, кој активистите и го обоија со спреј.
Демонстрантите протестираа под паролата „Every Child Matters“ (Секое дете е важно), а полицијата досега уапси едно лице поради уривањето на спомениците.
Пред месец дека беа пронајдени 215 гробови во училишен двор во градот Кампупс во покраината Британска Колумбија. Пред една недела 751 детски гроб беше откриен во училишен двор во западниот дел на покраината Саскачеван, додека завчера уште 182 гроба беа откопани во Камлупс. Сите гробови се неименувани, односно не се знаат имињата на закопаните домородни деца.