Славниот актер Вилијам Шатнер очекувал дека ќе достигне „катарза“ по историскиот лет во вселената, на кој го испрати милијардерот Џеф Безос. Наместо тоа, патувањето го остави исполнет со тага.
„Моето патување во вселената требаше да биде прослава, наместо тоа се чувствував како да сум на погреб“, се наведува во цитат од неговата книга „Boldly Go: Reflections on a Life of Ave and Wonder“.
„Ги сакам мистериите на универзумот. Ги сакам сите прашања кои ни доаѓаат во текот на илјади години истражување и хипотези. Но, кога погледнав во спротивниот правец, во вселената, немаше никакви мистерии, никакво величествено почитување. Сѐ што видов беше смрт“, напиша Шатнер.
Минатата година во октомври со капсулата Blue Origin на Џеф Безос, Шатнер патуваше во вселената. Една година подоцна, тој го опишува ова искуство како „студено, мрачно, црна празнина, длабока, сеопфатна“.
„Сѐ што мислев испадна погрешно. Сѐ што очекував да видам беше погрешно. Мислев дека патувањето во вселената ќе биде конечната катарза за врската што ја барав меѓу сите живи суштества – дека горе ќе биде следниот преубав чекор кон разбирање на хармонијата на универзумот“.
Актерот, кој го освои светот со улогата на капетан Џејмс Кирк во Star Trek, се расплака по слетувањето опишувајќи дека го доживеал „најдлабокото искуство што може да го замисли“.
Но, една година подоцна тој објаснува:
„Открив дека убавината не е таму, таа е овде долу, со нас. Тоа што ја оставив зад себе ја направи мојата врска со нашата мала планета уште подлабока. Тоа беше едно од најсилните чувства на тага со кои досега сум се сретнал. Контрастот меѓу студенилото на вселената и топлината на Земјата ме исполни со голема тага. Секој ден се соочуваме со сознанија за понатамошно уништување на Земјата. Изумирање на животински видови, флора и фауна, работи за кои требало 5 милијарди години да се развијат и одеднаш никогаш нема да ги видиме повеќе. Тоа ме исполни со ужас. Мојот пат во вселената требаше да биде прослава, наместо тоа се чувствував како да сум на погреб“, објаснува тој.
