Колумбискиот офанзивец открива дека минатото лето малку фалело да си замине од Мадрид откако за него имало понуди од клубови од Шпанија и од Италија.
Хамес Родригес дојде во Реал Мадрид од редовите на Монако веднаш по Мундијалот во Бразил 2014 година каде импресионираше со неговите настапи за репрезентацијата на Колумбија. Првата сезона ја одигра одлично, но потоа неговата форма почна да оди надолу.
„Имаше многу добра понуда од еден шпански тим, која Реал Мадрид ја одби. Сепак нема да го откријам името на клубот. Мислев дека сѐ е договорено, но не ми дозволија да потпишам. Сакаа да одам во друг клуб“, открива Хамес зборувајќи за колумбискиот портал Gol Caracol.
За играч со квалитети како Хамес не поминува преоден рок со само една понуда од добар клуб. Открива дека можел да се пресели и на Апенините и на Далечниот Исток.
„Потоа имаше и друга понуда од Италија која сепак не ме убеди. Едноставно мислев дека не е добра. Мојот агент Хорхе Мендес ми кажа и дека пристигнала понуда од Кина, но таа веднаш ја одбив. Му реков дека не сакам да одам таму бидејќи сѐ уште имам што да покажам во Европа“, вели тој.
Под водство на Зинедин Зидан офанзивецот не е во преден план. Малку игра и поради тоа често се шпекилураше дека причината за тоа е дека не е во добри односи во Французинот. Сепак, тој тоа го демантира.
„Никогаш сум немал проблем со Зидан. Секој тренер има свој вкус. Со него имам нормален работен однос. Немам главна улога, но тренирам напорно за кога ќе дојде мој ред да можам добро да одиграм“.