Креативецот од средниот ред, Енис Барди, поради повреда нема да може да ѝ се стави на располагање на репрезентацијата за квалификациските натпревари против Лихтенштајн в петок и против Германија на 11-ти.
Од Фудбалската федерација на Македонија утрово ја соопштија лошата вест за нашиот национален тим, вест која и не беше до толку неочекувана со оглед на тоа што Барди не игра ни во својот клуб Леванте. Тој има повреда на задниот бутен мускул која ја доби играјќи токму за репрезентацијата на последниот септемвриски натпревар против Романија.
Селекторот Благоја Милевски нема да повикува друг фудбалер како замена за повредениот Барди. Всушност, замена веќе има бидејќи новопечен репрезентативец е поранешниот младински репрезентативец на Шведска, Ердал Ракип, кој одлучи во иднина да ги брани боите на Македонија, земјата од каде потекнува (неговите се од Преспа).
Репрезентативците од синоќа почнаа да се екипираат во хотелот „Хилтон“ во Скопје. Во базата пристигати се Адис Јаховиќ, Стефан Ашковски, Висар Муслиу, Тихомир Костадинов, Дејан Илиев, Стефан Спировски, Кире Ристевски, Дамјан Шишковски и Никола Ѓорѓев. Сите останати повикани денеска ќе му се приклучат на тимот.
Првиот тренинг македонската репрезентација ќе го има денеска од 16:00 часот на тренинг центарот „Петар Милошевски“ во Ново Лисиче.