Менаџерот на „Граѓаните“ на крајот од натпреварот помеѓу Манчестер Сити и Лидс Јунајтед (2:1) беше бесен на својот играч Ерлинг Холанд, бидејќи изведувањето на пеналот му го препушти на Илкај Ѓундоан и со оглед на тоа што Германецот промаши, ја доведе во прашање победа на неговиот тим и освојувањето три бода.
При водство од 2:0 Манчестер Сити доби удар од белата точка, а Холанд, кој е првиот изведувач на пенали во овој тим, му го препушти ударот на Ѓундоан, кој доколу погодеше можеше да прослави хет-трик со оглед на тоа што претходно ги постигна двата гола. Жузеп Гуардиола побара од Норвежанецот да го изведе пеналот, но тој му ја препушти топката на играчот од средниот ред и тоа многу го налути каталонскиот стратег.
Веќе во следниот напад, поточно веднаш по промашувањето, Лидс намали на 2:1, а камерата го покажа Гуардиола кој беше многу незадоволен од одлуката на Холанд.
„Доколку Ѓундоан го дадеше, сѐ ќе беше во ред. Хет-трик, одлично, одиме понатаму... Но, изведувачот си е изведувач. На 2:0 тоа е задача, особено во англиската лига. Тоа не е ситуација каде можеш да заборавиш кој изведува пенал, тоа не е дозволено“, изјави Пеп и продолжи:
„Во Англија натпревар не завршува на 2:0. Ако беше 4:0 и 10 минути до крајот, тогаш во ред... Сакав пеналот да го изведе играч кој нормално го прави тоа. Тоа значи Холанд или Махрез. Меѓутоа и оваа ситуација покажува каква личност е Ерлинг. Тој сакаше да го израдува својот соиграч, покажа дека неговите соиграчи му се многу важни. Го почитувам тој потег на Холанд, но сепак тој требаше да го изведе пеналот бидејќи тој е специјалист за тоа“.
За среќа на Манчестер Сити, на крајот „Граѓаните“ сепак успеаја да ја одбранат предноста и да победат и со тоа да освојат три бода, па сега се први на табелата со 82 освоени бода, четири повеќе од второпласираниот Арсенал.
