Хрватска ќе го воведе еврото како своја национална валута, а премиерот Пленковиќ денеска претстави како ќе изгледа националната страна на монетите од хрватските центи и евра.
На Советот за воведување на еврото, премиерот Андреј Пленковиќ ги претстави дизајните на националната страна на хрватските монети од евро и центи.
На монетата од 2 евра ќе стои карта на Хрватска, на 1 евро - куна, на 50, 20 и 10 центи Никола Тесла, додека на 5, 2, 1 цент ќе биде напишано ХР со глаголица.
„Дизајнот на мотивите што ќе ја претставуваат Хрватска ќе се најде на монетите од еврото и центите кои ќе бидат во оптек во Хрватска и другите 19 земји членки на еврозоната, а Владата со заклучок потврди дека мотивите се: хрватска шаховница, карта на Република Хрватска, куна, ликот на Никола Тесла и писмото глаголица“, рече Пленковиќ.
Секоја земја има можност да стави национален мотив на едната страна од паричката, а во Хрватска се искристализираа следните предлози: мотивите ќе бидат шаховница, и тоа на сите монети, потоа карта на Хрватска, куни, Никола Тесла и глаголица.
Заднината ќе биде шаховницата, а на монетата од 2 евра ќе биде картата на Хрватска, на 1 евро куната, на 50, 20 и 10 центи Тесла, а глаголицата на која стои скратеницата ХР на 5, 2 и 1 цент, беше откриено претходно, по што беше објавен конкурс кој беше анонимен.
На монетата од 2 евра ќе има и стих од Химната на слободата на Гундулиќ „O lijepa, o draga, o slatka slobodo“.
Националниот план за замена на хрватската куна со евро, усвоен од владата во декември 2020 година, предвидува избор на мотиви и нивниот графички дизајн за националната страна на монетите евра, а Хрватската народна банка е назначена како институција која ќе ги набавува евро банкнотите и монетите.
За разлика од евро банкнотите, кои се исти во сите членки на еврозоната, монетите во евра и центи носат информации од земјата издавач и ги прикажуваат националните симболи на земјата на задната страна. Реверсот на монетата затоа се нарекува и национална страна на монетите во евро и центи. Кога Хрватска ќе го воведе еврото за својата валута, евро монетите издадени во Хрватска ќе бидат во оптек и ќе важат во сите земји од еврозоната.
„Изборот на мотиви особено е важен бидејќи монетите со мотиви кои ја симболизираат Хрватска ќе се користат надвор од нејзините граници. Со оглед на сложеноста на производството на монети, подготвителните активности веќе се започнати. Производството на монети евро со хрватска национална страна треба да започне најрано шест месеци пред денот на воведувањето на еврото, односно по одлуката на Советот на ЕУ дека Хрватска го воведува еврото“, соопшти хрватската влада.
