Lionsgate објави трејлер за четвртото продолжение на „John Wick“, со Кијану Ривс во главната улога.
Од прв поглед е јасно дека нè очекуваат многу возбудувања и добра акција. Трејлерот го прикажува Ривс, повторно повлечен во мрачен свет, за да ги исправи грешките од минатото.
Според синопсисот, новиот филм открива дека Вик е на добар пат да ја победи криминалната организација со која се бореше во претходните филмови.
Пред Вик да успее во намерата и „заслужи победа“, мора да се соочи со нови непријателски сили, кои против него ќе ги свртат дури и неговите стари пријатели.
Трејлерот почнува со Вик кој ја оплакува починатата сопруга, а го прикажува и негативецот, улога што ја толкува актерот Бил Скарсгард.
Режисер на филмот е Чад Стахелски, а зад сценариото стојат Шеј Хејтен, Мајкл Финч и Дерек Колстад.
Премиерата е закажана за 24 март.