Од рамните рабови до Dynamic Island засекот за камера - кинеската компанија навистина се потрудила за LeEco S1 Pro да изгледа како iPhone.
Не е тајна дека многу производители на паметни телефони пронаоѓаат инспирација во уредите на Apple. Сепак, сега кинеската компанија LeEco (Letv) надмина сѐ и на домашниот пазар издаде нешто што може да се нарече само директна копија на iPhone - LeEco S1 Pro.
Дизајнот на новиот уред е сѐ што можете да очекувате од телефон кој за многу помалку пари наликува на моделите на гигантот од Купертино. Системот на камерата на задната страна на прв поглед е речиси идентичен, но поставен малку пониско. Рамните рабови се таму, но копчињата се во склад со другите телефони со Android и нема прекинувач за исклучување. Не изостана пресекот Dynamic Island на предната камера, а LeEco дури успеа да го победи iPhone во една област - на дното има USB-C приклучок.
Да се очекува OLED екран и симетрични рамки од телефон кој чини 899 јуани (околу 123 евра) е нереално. На предната страна се наоѓа 6,5-инчен LCD панел со резолуција од 720 x 1.600 пиксели и стапка на освежување од 60 Hz - идентично на моделите на iPhone кои не се Pro. Сепак, она што најмногу привлекува внимание е засекот на предната камера.
Apple долго време се одолева на критиките од јавноста да го отстрани озлогласениот засек од своите уреди и да се префрли на помодерни решенија, а најголема причина за тоа беше системот за препознавање лице Face ID. Меѓутоа, во септември минатата година компанијата конечно тргна напред и го претстави засекот во облик на таблета, нарекувајќи го Dynamic Island. Може да се каже и дека LeEco S1 Pro има Dynamic Island, кој нуди и можност за отклучување со лице, но за разлика од Купертино, за сѐ е одговорна само една камера од 5 MP, а обликот на засекот е чиста естетика. И покрај ова комично решение, му испраќаме пофалби на производителот што нивниот Dynamic Island има и одредена софтверска функционалност.
Освен што на задната страна на уредот има камера од 13 MP, LeEco не сподели други информации, па не се знае дали останатите камери се функционални или се таму само заради естетика.
Кога станува збор за перформансите, LeEco S1 Pro се напојува со осмојадрен чипсет Zhanrui T7510 (4 x Cortex-A75 на 1,8 GHz и 4 x Cortex A55 на 1,8 GHz), додека за игрици е задолжена графичката Imagination 9446, со брзина на такт од 800 MHz, а сето тоа е поврзано со 8 GB RAM и 128 GB внатрешна меморија.
Она што исто така треба да се пофали на овој уред е батеријата со капацитет од 5.000 mAh. За жал, нема безжичното полнење и магнети, а уредот се полни преку кабел со моќност од само 10 W, па клиентите не треба да очекуваат да го наполнат телефонот за помалку од 2 часа.
Компанијата не сподели други спецификации, па освен тоа што поддржува 5G, не знаеме многу. Сепак, она што го знаеме е дека LeEco S1 Pro се потпира на услугите на Huawei, така што сите придобивки од HMS ќе бидат достапни за клиентите и не се сомневаме дека овој уред ќе биде целосно функционален дури и во Македонија.
