Белата куќа ја упати својата најжестока критика досега за рускиот пилот кој со борбен авион влета во американско воено беспилотно летало, при што висок функционер го нарече лицето „во најдобар случај идиот“.
Минатата недела руското Министерство за одбрана им додели награди на двајца пилоти кои неколку дена претходно над Црното Море пресретнаа беспилотно летало MQ-9 Reaper на американската армија. Еден од пилотите на борбениот авион Су-27 го покоси дронот, кршејќи му го пропелерот и принудувајќи ги САД да го соборат.
Запрашан од новинарите за време на брифингот во средата за неговиот став за наградата, портпаролот на Советот за национална безбедност на Белата куќа, Џон Кирби, ја критикуваше Русија и пилотите за инцидентот.
„Не знам за друга војска во светот, друга воздухопловна сила во светот, која би го наградила пилотот за соборување на дрон“, рече Кирби.
„Ако тоа е храброст, тогаш претпоставувам дека тие имаат поинаква дефиниција. Тоа е смешно, тоа е навредливо“, додаде тој.
Тој тврди дека видео доказите се доста убедливи дека пилотот намерно го удрил дронот.
„Во морнарицата каде што пораснав, не сакате да погодите ништо. Да удирате што било е лошо за вас“, рече Кирби.
„Немам поим зошто би му дале награда за храброст на пилот кој, во најлош случај, злонамерно се изложил себеси и американските средства на голем ризик, а во најдобар случај, е само идиот“, додаде тој.