Ливерпул изгледа ќе го донесе Луис Суарес во своите редови летово, објави британски Daily Mail повикувајќи се на шпански извори.
Јирген Клоп делумно ќе го реконструира тимот летово, а најголем проблем му е потенцијалното заминување на Мохамед Салах. Египќанецот во неодамнешното интервју изјави дека би сакал да игра за Реал или Барселона, а по многу слабата сезона во Ливерпул, постои опција навистина да го напушти „Енфилд“ на лето.
Доколку се случи тоа, Ливерпул ќе бара нов напаѓач, а по малку е неверојатна веста дека ќе го донесе 34-годишниот Суарес за оваа позиција.
Уругваецот е во страшна форма и со своите 19 гола го задржува Атлетико на врвот на табелата.
Покрај шпанските клубови, за Салах, наводно, се заинтересирани и ПСЖ и Баерн, но Англичаните тврдат дека треба да дојде астрономска понуда на „Енфилд“ за која клубот би го ослободил својот најдобар играч. Но, ако Ливерпул не влезе во Лигата на шампионите следната сезона, ќе биде тешко да го задржи Салах.
Луис Суарес беше во Ливерпул од 2011 до 2014 година и постигна 82 гола на 133 натпревари со 47 асистенции. Летото 2014 година, откако Ливерпул остана без титула на „инфарктен начин“, Уругваецот замина во Барселона за вкупно 82 милиони евра.